1.72Kviews
හැමදාම ගෙදර තියෙන කිරිපිටි වලින් කිරියි, තේයි හදලා බොන එකේ පිටියි සීනියි කවලම් කරන් කන එකෙයි ඒ දෙක එකතු කරන් හදමුකෝ පුඩිමක්. ඕනම කිරි පිටි ජාතියක් මේකට පාවිච්චි කරන්න පුළුවන්.
ඔන්න ඕන දේවල්;
- කිරි පිටි මේස හැඳි 5ක්
- සීනි මේස හැඳි 10ක්
- බිත්තර 2-3
- වැනිලා තේ හැඳි 1
- බටර්
- කුරුඳු කුඩු ටිකක්
- වතුර මිලි ලීටර් 100 – 150
හදන විදිහ –
- සීනි මේස හැඳි 5ක් අරන් වතුර ටිකක් දාලා සීනි කැරමල් කරගන්න.
- පුඩිම හදන්න ගන්න භාජනේ හොඳට බටර් ගාගන්න.
- කැරමල් ටික ඒ භාජනේට දාලා නිමෙන්න තියන්න.
- බිත්තර ටික කඩලා බ්ලෙන්ඩර් එකට දාගන්න.
- පිටියි සීනියි ලා රස්නේ උණු වතුරෙන් දිය කරගන්න හොඳට.
- දැන් ඒකත් බ්ලෙන්ඩර් එකට දාගන්න.
- ඊළඟට වැනිලා තේ හැඳයි කුරුඳු කුඩු ටිකයි ඒකට එකතු කරලා හොඳට බ්ලෙන්ඩ් කරගන්න.
- ගොඩක් වෙලා බ්ලෙන්ඩ් කරගන්න ඕන නෑ. විනාඩි 2ක් – 3ක් ඇති.
- දැන් අර කැරමල් දාගත්ත භාජනේට මේ මිශ්‍රණේ දාගන්න. හැබයි පෙනේරෙකින් පෙරන ගමන් දාගන්න ඕන.
- භාජනේ හොඳට ෆොයිල් පෙපර් එකකින් වහලා හුමාලෙන් තම්බන්න විනාඩි 45 – 60 විතර.
මතක තියාගන්න ඕන දේවල් –
- කැරමල් හදන් ඉවර වුණාම රයිස් කුකර් එකට හරි ඔයාලා හුමාලෙන් තම්බන්න ගන්න භාජනේට හරි වතුර දාලා ඒක රත් වෙන්න තියන්න. වතුර රත් වුණාම විනාඩි 30 – 40ක් වගේ කාලෙකින් පුඩින් එක හදාගන්න පුළුවන්.
- වතුර දාලා භාජනේ අඩියට තුවායක් හරි රෙද්දක් හරි දාන්න. එහෙම කළාම වතුර නටන කොට එන පීඩනය අඩුවෙලා වාෂ්ප විතරක් උඩට ඇවිත් පුඩින් එක හොඳට තැම්බෙනවා.
- ෆොයිල් පේපර් එකක් නැත්තන් ලන්ච් ෂීට් එකකින් වහලා හොඳට වටේ සීල් කරගන්න. හැබැයි උඩින් හිල් විඳින්න නම් එපා.
- තැම්බිලා ඉවර වුණාම රස්නේ යනකල් හොඳට නිමෙන්න දෙන්න. ඊට පස්සේ ශීතකරණයට දාන්න. රස්නේ පිටින්ම දැම්මොත් කැරමල් ටික ගල් වෙන්න පුළුවන්.
- පැය 2 – 3 ට පස්සේ පුඩින් එක අනික් පැත්ත හරවලා රස බලන්න පුළුවන්.
නදීශානි බණ්ඩාර දොඩංගොල්ල | Athirasa [ Kitchen ]
